#12 Една година АЕТМ & Предновогодишна прослава [Декември]

Изминатава година напорно работевме на кревање на свеста за важноста на е-трговијата, за мапирање на предизвиците, за креирање на препораки за раст на индустријата, за едуцирање... На самиот крај на оваа успешна и прва година од основањето на АЕТМ, со своите членови, соработници, пријатели и партнери во духот на предновогодишното расположение, заеднички наздравивме, прославивме и си посакавме уште подобри и поуспешни моменти во 2019 година.

#11 Меморандум за соработка со МАСИТ [Декември]

Потпишавме меморандум за соработка со Стопанска комора за информатички и комуникациски технологии – МАСИТ со цел заеднички да придонесеме кон развојот на е-трговијата и развивањето на способностите, дигиталната писменост и градењето на капацитети во секторот за е-трговија во Република Македонија. 

#10 Меморандум со Економски Факултет, при УКИМ [Ноември]

Со поптпишување на меморандум за соработка со Економски факултет - Скопје ја зголемуваме соработката со високо образовните институции, со цел да ја зголемиме инволвираноста на професорите, а особено и на студентите како носечка алка за забрзување на развојот на е-трговијата и придонес кон поголеми знаења од оваа област како интегрален дел од процесот на дигитализацијата.

#9 Прва годишна конференција за е-трговија во Македонија [Октомври]

Македонија ја доби својата прва конференција за е-трговија! Темата на конференцијата беше "Е-трговија: Е-иднината за Е-Македонија!", инспирирана од нашето силно уверување дека иднината за подобра Македонија лежи во дигитална држава и паметно општество, а е-трговијата е составен дел од таквото општество.

#8 Меморандум со ФИНКИ [Септември]

Асоцијацијата за е-трговија на Македонија и Факултетот за информатички науки и компјутерско инженерство – ФИНКИ потпишаа меморандум за соработка со цел заеднички да придонесат кон развојот на е-трговијата и развивањето на способностите, дигиталната писменост и градењето капацитети во секторот за е-трговија во Македонија.

#7 Настан со Царинска Управа и ДХЛ за ПРЕКУ-ГРАНИЧНА Е-ТРГОВИЈА [Септември]

Асоцијација за е-трговија на Македонија, во соработка со Царинската Управа и DHL организираше едукативен настан каде што е-трговците имаа можност да слушнат за поедноставените царински постапки директно од претставници од Царинската управа, како и за важноста на доставата за е-трговијата и процесот на испорака.

#6 Меморандум со Царинска Управа на Република Македонија [Јуни/Јули]

Потпишавме Меморандумот за соработка со Царинска управа на Р.М., кој воедно претставува и зачленување на Царинската Управа на Р.М како почесен член во АЕТМ.

#5 Промоција на Извештајот од анализата за е-трговија на Република Македонија [Jуни]

После петмесечна напорна работа и интензивно истражување, на 21 јуни го објавивме и промовиравме Извештајот од сеопфатната анализа за е-трговија со назив: “Подготвеност, потенцијал, фактичка состојба, бариери и препораки за развој на е-трговијата во Р. Македонија”.

#4 UNCTAD Ecommerce Week [Aприл]

Претседателот на Асоцијацијата за е-трговија на Македонија, Нина Ангеловска ја претставуваше Македонија на првиот глобален собир на Асоцијации за е-трговија на eCommerce Week. Лидерите на асоцијациите ги дискутираа предизвиците со кои се соочуваат нивните држави, разменија искуства и споделија најдобри практики.

#3 Градење капацитети: “Ladies in E-commerce” [Април]

“Ladies in eCommerce” беше дводневен едукативен настан кој се состоеше од тренинзи и работилници во полето на е-трговијата. Главната цел беше да се обезбеди знаење за е-трговијата што ќе придонесе кон зголемување на капацитетите и конкурентноста во ММСП, земајќи ја во предвид родовата димензија.

#2 Прес-конференција – Launch & Brunch [Март]

Основањето на асоцијацијата беше претставено во март за време на прес-конференцијата каде што на јавноста и беа презентирани мисијата, визијата и програмата на АЕТМ. Во оваа пригода, Претседателот на АЕТМ сподели статистички податоци за развојот на е-трговијата во Македонија.

#1 Годишно собрание [март]

На годишното Собрание кое се одржа во Хотел Порта, присуствуваа дваесет и три претставници од компаниите – членки на АЕТМ каде се разменија идеи, коментари и предлози што се однесуваат на предизвиците на е-трговијата во различни индустрии.