Со Искра Тикваровска Казанџиевска, oдговорна за маркетинг во ЕВН Македонија поразговаравме за низата на нови услуги од ЕВН Македонија кои дополнително го олеснуваат добивањето и плаќањето на фактурите за електрична енергија, како и за актуелната кампања за промоција на онлајн проверка и плаќање на сметките на сервисот ЕВН онлајн.
Комплетното интервју можете да го прочитате во продолжение.
AETM:Пред неколку години, ЕВН го воведе онлајн плаќањето на сметки за електрична енергија. Во тек е нова кампања за овие услуги. За што точно се работи и какво е вашето искуство досега?
Искра Тикваровска Казанџиевска: ЕВН во континуитет работи на воведување нови и подобрување на постоечките услуги за добивање и плаќање на фактурите за електрична енергија. Во моментов во тек е кампања за промоција на сервисот ЕВН Онлајн. На www.evnonline.mk корисниците можат да се пријават за електронска фактура или да ги платат сметките со и без регистрација на кориснички профил. Причината за промоцијата е надградбата на сервисот за плаќање преку регистрација на кориснички профил. Повторно се потрудивме да искористиме впечатлива ситуација од популарната култура, имено „огромната“ сличност на актерот и комичар Гораст Цветковски и најуспешниот македонски кошаркар Перо Антиќ. Кампањата досега има висока видливост – како во традиционалните така и во дигиталните медиуми и добива генерално позитивни критики.
AETM: Освен онлајн плаќање на фактурата за електрична енергија, кои други услуги се достапни преку вашиот веб сајт www.evnonline.mk? Дали на пример постои опција за плаќање на повеќе фактури одеднаш?
Искра Тикваровска Казанџиевска: Корисничкиот портал „Е-пункт“ што беше една од услугите на www.evnonline.mk сега е надграден и преименуван во „Мој ЕВН Хоме“. Отсега преку „Мој ЕВН Хоме“ на корисниците со регистрација на профил достапни им се низа нови услуги кои дополнително го олеснуваат плаќањето на фактурите за електрична енергија и ја зајакнуваат довербата во онлајн плаќањето. Најголемата промена е дизајнот на порталот, што сега е респонзивен. Тоа значи дека корисниците можат непречено да го користат од било каков уред што е особено важно во време на интензивно користење на мобилни уреди. Во делот на самите услуги, досега корисниците кои во профилот имаа повеќе неплатени сметки, плаќањето требаше да го прават сметка по сметка. Отсега, постои можност за плаќање на повеќе фактури одеднаш. Понатаму, корисниците можат да регистрираат повеќе броила односно места на потрошувачка во еден профил, a новитет е тоа што едно броило може да се регистрира во повеќе профили. Ова особено е важно за семејства во кои плаќањето го вршат повеќе членови на семејството, или пак, сопственици на имоти кои се даваат под наем кои отсега ќе можат да им дозволат и на закупците да плаќаат онлајн.
Една од најбараните услуги изминатите години е услугата за копија на фактура. Корисници кои сѐ уште немаат доверба во плаќањето онлајн, или пак од било која друга причина им е потребно да зачуваат или отпечатат копија од фактурата, тоа сега може да го направат преку „Мој ЕВН Хоме“. Достапни за преземање им се сите фактури, платени и неплатени од последните 12 месеци. Во нашето досегашно искуство имаме забележано дека потврдите за уплатите се една од најважните причини поради кои корисниците одлучуваат да плаќаат онлајн. Во овој поглед воведовме две нови услуги и тоа целосна детална историја на сите онлајн трансакции кои се остварени преку корисничкиот профил, како и опција за барање на дополнителна електронска потврда за сите успешни плаќања. Корисниците кои и претходно имале кориснички профил на старата платформа за плаќање, исто така ќе имаат увид во трансакциите кои ги оствариле од почетокот на користењето на онлајн услугите на ЕВН. Сите овие нови услуги се воведени како резултат на постојано следење на барањата и навиките на корисниците.
AETM: Спомнавте корисници на старата платформа „Е-пункт“. Како го организиравте тој премин во нова услуга за плаќање? Какво е искуството по промоцијата на новата платфома за плаќање?
Искра Тикваровска Казанџиевска: Сите корисници кои претходно имале профил на т.н. „Е-пункт“ што сега е преименуван и надграден во „Мој ЕВН Хоме“ имаат можност да продолжат непречено да го користат новиот сервис. Сѐ што треба да направат е при првата најава во новиот систем да ја внесат е-маил адресата со која што оригинално се регистрирале на „Е-пункт“ како корисничко име, а во полето за лозинка да ја внесат старата лозинка. Следен чекор е промена на лозинката поради воведување на повисоки стандарди за безбедност. Од почетокот на кампањата досега, веќе околу 70% од активните корисници на услугата се префрлени на новиот систем. Очекуваме во следните месеци оваа бројка дополнително да се зголемува. При било какви проблеми со најавувањето, регистрацијата и плаќањето на ЕВН Онлајн корисниците можат да го побараат нашиот 24/7 контакт центар за поддршка на 089 089 089.
AETM: На тема број на корисници, колкав е интензитетот на користењето на онлајн услугите и какви се ефектите на кампањите врз оснесувањето на корисниците?
Искра Тикваровска Казанџиевска: Од воспоставувањето на услугата за онлајн плаќање, интересот за услугата, како и бројот на корисници е во постојан и постепен раст. При анализа на овој тренд, може да се забележи дека растот е на некој начин органски што потекнува од реалните потреби на корисниците, а новите корисници по позитивното прво искуство продолжуваат со користење на услугите. Во тек е трета кампања за онлајн услугите на ЕВН, најуспешна досега. Само во првиот месец на оваа кампања за услугата Е-фактура регистрирани се ист број корисници колку во трите месеци за време на кампањата во 2018 година. Бројките за „Мој ЕВН Хоме“ се уште поголеми. За време на овој промотивен циклус, регистрирани се двојно повеќе корисници отколку за целата мината кампања. И услугата „Брзо плаќање“ (плаќање без регистрација) е во пораст. Бројот на трансакции месечно во претходната кампања беше околу 3.000, а сега е над 20.000. Како најуспешен дигитален канал за промоција и во оваа кампања се социјалните медиуми. Сметаме дека причините за овој прогрес се повеќеслојни. Во време на сеопшта дигитализација на животот, две години се многу долг период. Две години подоцна, граѓаните очигледно поинтензивно ги користат социјалните и дигиталните медиуми. Искуството во купувањето онлајн е исто така поголемо, па потребно е само постојано охрабрување за плаќање на сметките онлајн преку информативни промотивни содржини. Фактот што понудивме нови и подобрени онлајн услуги кои корисниците долго ги бараа се причина повеќе за поголемиот успех. Од друга страна, кампањата е прилично смела, односно визуелно и содржински интересна и тоа само по себе предизвикува интерес.
AETM: ЕВН е една од општествено најодговорните компании во нашата земја со многу активности кои ги практикувате секоја година. Во декември, вашиот проект „Електромобилност со ЕВН“ преку кој развивте инфраструктура за полнење на електрични возила низ нашата држава ја освои првата награда во категоријата однос кон животната средина на доделувањата на наградите за Најдобри општествено одговорни практики на македонските претпријатија за 2019 година. Кои се понатамошните планови во оваа област?
Искра Тикваровска Казанџиевска: Во рамки на проектот „Електромобилност со ЕВН“ поставивме 40 станици за полнење на електрични возила на јавно достапни и фреквентни локации ширум државата. Во моментов полнењето на овие станици е бесплатно и во континуитет го следиме трендот на користењето. Планот е да се прошири мрежата кај повеќе ресторани, хотели, шопинг центри и други деловни објекти преку остварување на партнерства. Исто така, една од целите на проектот ни беше да ја поставиме Македонија на мапата на земји со широко распостранета мрежа на полначи со што веќе нема да биде заобиколувана од возачи на електрични возила од странство. Многу ми е мило што во моментов имаме најави за неколку групи на возачи на електрични возила кои оваа пролет и лето во конвои возат низ Европа и планираат да ги користат нашите полначи. Особено интересен за овие возачи е полначот што го поставивме пред нашиот „Изложбен центар Матка“, каде што веќе три години постои првиот и единствениот едукативен центар за електрична енергија во нашата земја.
AETM: ЕВН Македонија е член во Асоцијацијата за е-трговија на Македонија, а беше и еден од главните спонзори на првата конференција за е-трговија на Македонија, со што покажa дека придава големо значење на е-трговијата во нашата земја. Кои, според вас, се работите што треба да се променат во Македонија, со цел оваа дејност да го достигне својот максимум?
Искра Тикваровска Казанџиевска: Подобрувањето, односно интензивирањето на електронската трговија е нешто на што треба да работат повеќе чинители во општеството. Можам да зборувам за улогата на бизнисот, од нашето досегашно искуство во оваа област. Пред сѐ, неопходно е во континуитет да се работи на едукација и промоција на дигиталните услуги што ги нудат компаниите. Одлуката за купување онлајн во нашиот контекст не се носи веднаш, и важно е постојано да се работи на информирање и подигнување на свеста. Тука се разбира битна е транспарентноста. На корисникот треба да му се лесно достапни сите информации потребни при купувањето, од цена до детали за плаќањето, достава, итн. Понатаму, задоволството на корисниците од користењето на услугите е клучно. Треба да ни е јасно дека незадоволен корисник од еден онлајн сервис истовремено ја намалува довербата во сите сродни услуги. Токму затоа, квалитетот треба секогаш да е во преден план, но и воведување на системи за корисничка поддршка и обезбедување на високо ниво на безбедност на услугите. На крај, несомнено е дека услугите треба постојано да се унапредуваат согласно технолошките трендови, со фокус на севкупното корисничко искуство.
