Denarior е релативно нов софтвер на македонскиот пазар, но темите што ги адресира се сè, само не нови – фактурирање, наплата, залихи и усогласеност со регулативата. Со задолжителното воведување на е-фактури од 2026 година, ваквите системи од „опција“ ќе прераснат во нужност, особено за е-трговците и компаниите кои работат со поголем обем на нарачки.
Во интервју за ecommerce.mk, со Митко од Denarior и сопственик на WebPigment – наш член во Асоцијацијата за е-трговија на Македонија, разговараме за тоа како бизнисите навреме да се подготват за она што доаѓа.
За почеток, што е Denarior и кој проблем го решава?
Митко од Denarior:
Denarior е комплетен систем за фактурирање и деловно управување, креиран специјално за македонски компании. Во пракса, решаваме еден голем и чест проблем – губење време, пари и контрола поради рачно водење фактури, неследени наплати и неусогласени залихи.
Голем дел од компаниите сè уште работат во Excel или на хартија, а од 2026 година е-фактурите стануваат задолжителни преку УЈП. Нашата цел е бизнисите навреме да преминат на автоматизиран систем, без стрес и импровизации во последен момент.
Кои се клучните функционалности на системот?
Митко од Denarior:
Denarior е дизајниран да биде практичен и лесен за користење. Неколку функционалности што корисниците најмногу ги ценат се:
- Паметно фактурирање – системот ги препознава клиентите по ЕМБС, внесувате еднаш, потоа сè се пополнува автоматски
- Управување со залихи во реално време – со автоматски ажурирања и известувања за ниска залиха
- FIFO алокација на плаќања – автоматско распределување на уплатите по редослед на фактури
- Автоматска ДДВ пресметка и извештаи подготвени за сметководство
- Професионални PDF фактури со целосна поддршка за кирилица и македонски јазик
Како Denarior се вклопува во е-трговијата? Имате ли веќе постоечки интеграции со e-commerce решенија или API интеграции за custom решенија?
Митко од Denarior:
Ова ни е еден од најважните сегменти. Denarior има директна WooCommerce интеграција, што е особено значајно бидејќи WooCommerce е најкористената платформа за е-трговија кај нас. Практично, тоа значи:
- секоја онлајн нарачка автоматски се појавува во Denarior
- залихата е единствена – без разлика дали продавате онлајн или офлајн
- фактурите може автоматски да се генерираат за секоја нарачка
- сите онлајн купувачи се зачувуваат како клиенти во системот
За е-трговците ова значи крај на рачно внесување, грешки и ситуациите „продадовме производ што го немаме на залиха“.
Во моментов, WooCommerce е првиот чекор, а веќе работиме на Shopify и Magento, како и на API поврзување за custom решенија. Секогаш ги слушаме реалните потреби на клиентите и според тоа ги поставуваме приоритетите.
Denariror се појавува кога УЈП практично го најавува очекуваниот проект за е-фактура во 2026 година. Дали идејата за Denariror произлезе токму од потребата да се олеснат процесите на компаниите кои ќе треба да интегрираат е-фактура во нивното работење?
Митко од Denarior:
Denarior пред се беше изработен за потребите на клиент кој имаше проблем со контрола на залихи и влезно/излезни фактури. Кога УЈП најави е-фактури ние како фирма почнавме да бараме соодветно решение за фактурирање и покрај многубројните решенија не можевме да најдеме идеално решение за фирма како Веб Пигмент која нуди услуги. Тогаш решивме да инвестираме повеќе време во разградување на системот.
Каков е моментаниот статус со Denariror? Во која фаза е продуктот? Колку фирми го користат, за какви бизниси е наменет?
Митко од Denarior:
Првата верзија од продуктот е веќе достапна и се користи од неколку компании. Софтверот е модуларен и се прилагодува на различни индустрии – трговија, услуги, е-трговија, транспорт, туризам. Не нудиме „one-size-fits-all“ решение, туку го приспособуваме софтверот на начинот на кој реално функционира бизнисот. Најголем бенефит ќе видат фирмите кои нудат услуги на пример сметковоствените бироа бидејќи по сетирање на системот, нема да имаат потреба од креирање на фактури и системот ќе го прави тоа за нив.
Имате ли конкретни примери како функционира Denariror во пракса?
Митко од Denarior:
Еден клиент од секторот авто-делови трошеше околу 15 часа месечно само на рачно следење фактури. По воведувањето на Denarior, тоа време се сведе на 2–3 часа.
Но најинтересно беше што при миграцијата откривме заборавени, ненаплатени фактури – фактури што постоеле, но никој не ги следел. Системот веднаш ги идентификуваше и клиентот успеа да ги наплати. Тоа е реалната вредност – не само заштеда на време, туку и спречување финансиски загуби.
Ако една фирма сака да интегрира Denarior во сопственото работење. Колку е лесно да се премине од постоечки систем на Denarior? Дали имате поддршка во интеграцијата?
Митко од Denarior:
Нудиме целосна миграција – од Excel, друг софтвер или дури и хартиени евиденции. Ги внесуваме клиентите, фактурите, залихите и банкарските извештаи. Целта е да нема застој – денес работите по старо, утре сте целосно на Denarior.
За крај – какви се плановите на Denarior?
Митко од Denarior:
Краткорочно – да им помогнеме на што повеќе македонски компании навреме да се подготват за е-фактурите.
Долгорочно – да изградиме комплетна платформа за деловно управување, со повеќе e-commerce интеграции, аналитика, мобилни апликации и регионално присуство.
Но фокусот секогаш останува ист – едноставен, практичен софтвер што секој може да го користи од првиот ден.
