Денис Ампов, извршен директор на Ananas Македонија, е двигател на експанзијата и успехот на компанијата на локалниот пазар за е-трговија. Под негово водство, Ananas се истакна како клучен играч во регионот, нудејќи иновативни решенија за подобрување на онлајн шопинг искуството. Како спонзор на 7-та конференција за е-трговија во Македонија, Ananas ја покажува својата посветеност кон растот на индустријата. Денес разговараме со Денис за стратегијата на компанијата, предизвиците и перспективите во постојано менувачкиот пејзаж на е-трговијата.
AETM: Ananas направи значително влијание на регионалниот пазар за е-трговија. Кои клучни стратегии ги користевте и се уште ги користите за да го постигнете овој раст и како планирате да го одржите на долг рок?
Денис Ампов: Успехот на Ananas се должи на неколку клучни и стратешки осмислени чекори кои се насочени кон градење на довербата помеѓу локалните потрошувачи и трговци. Пред сè, се фокусиравме на локалната понуда, односно воспоставивме партнерства со трговци во регионот, а тоа ни овозможи да излеземе со понуда на производи кои се релевантни за локалните корисници. Ова не само што ги мотивираше потрошувачите да купуваат преку нашата платформа, туку ги охрабри и локалните бизниси да се дигитализираат и да ги продаваат своите производи на поширок пазар. Дополнително, користевме напредни технологии за да создадеме перзонализирано корисничко искуство, овозможувајќи им на корисниците да добиваат релевантни производи и услуги. Оваа стратегија значително придонесе кон растот на базата на лојални клиенти.
За да го одржиме овој раст на долг рок, фокусот планираме да го ставиме на неколку клучни аспекти. Прво, ќе продолжиме со иновации во областа на логистика и испорака, овозможувајќи побрза и посигурна услуга. Второ, ќе инвестираме во проширување на нашиот пазар, отворање нови можности за дигитални продукти и понуда на нови категории на производи, со што ќе ги привлечеме и задржиме корисниците. И секако, ќе продолжиме значително да инвестираме во маркетинг и промоција за постојано да ја зголемуваме видливоста и препознатливоста на нашата платформа.
АЕТМ: Како Ananas го приоритизира и подобрува корисничкото искуство на вашата платформа? Кои технологии или процеси беа најефикасни во зголемувањето на задоволството и задржувањето на корисниците?
Денис Ампов: Корисничкото искуство е еден од столбовите на нашата стратегија и секој аспект на платформата е дизајниран врз основа на идејата дека “Купувачот е крал”. Започнавме со темелна анализа на потрошувачките потреби и навики и поаѓајќи од тие податоци го обликувавме нашето решение. Користевме алгоритми за препораки базирани на вештачка интелигенција кои им овозможуваат на корисниците да добиваат производи и понуди кои се релевантни за нивните претходни купувања и интереси. Овие алгоритми се постојано унапредувани и прилагодувани со цел да го зголемат нивото на персонализација.
Еден од најважните процеси што го воведовме е подобрената платформа за корисничка поддршка, која им овозможува на клиентите брзо и лесно да го решат секој проблем со кој се соочуваат – како преку директна комуникација со нашиот тим, така и преку каналиите на социјалните медиуми. Овој процес беше особено ефикасен за зголемување на задоволството на клиентите, бидејќи овозможи навремено решавање на проблемите, а тоа е клучен фактор за нивно задржување.
Понатаму, воведовме процес за олеснување на враќањето на производите, што им даде дополнителна сигурност на купувачите. Кога корисниците знаат дека можат без проблем да ги вратат производите, тоа значително го намалува чувството на ризик и ги охрабрува да купуваат. Овие технологии и процеси не само што ја зголемија удобноста на купувачите, туку исто така придонесоа и за зголемување на нивната доверба во нашата платформа..
АЕТМ: Успехот во е-трговијата во голема мера зависи од ефикасната логистика. Со какви предизвици се соочивте при оптимизација на операциите за достава на Ananas, и како работите на обезбедување брза и сигурна достава низ вашите пазари?
Денис Ампов: Логистиката е една од најважните компоненти за успехот во е-трговијата и на почетокот се соочивме со значителни предизвици, особено во координацијата и усогласувањето со интерните процедури на локалните логистички оператори. Секоја земја има свои специфичности, инфраструктурни ограничувања и регулативи што влијаат врз доставата на производите. За да се справиме со овие предизвици, прво моравме да создадеме интегриран систем кој ќе овозможи брза и точна комуникација помеѓу нашата платформа и логистичките партнери.
Работевме на оптимизација на нашите капацитети за складирање и автоматизација на процесите за управување со залихите. Ова значително го намали времето на испорака, како и бројот на грешки при обработката на нарачките. Дополнително, воведовме опции за следење на нарачките во реално време, што им овозможува на корисниците да знаат каде се наоѓа нивниот пакет и кога точно да го очекуваат.
За да обезбедиме брза и сигурна достава, воведовме стандарди за квалитет и време на испорака кои сите наши партнери мора да ги почитуваат. Паралелно, работиме на проширување на нашата логистичка мрежа со вклучување на нови партнери и инвестирање во сопствени логистички капацитети, што ќе ни овозможи да ја подобриме ефикасноста и да одговориме на растечките потреби на пазарот.
АЕТМ: Просторот за е-трговија станува сè поконкурентен. Како Ananas се разликува од другите големи играчи на пазарот, и кои се вашите клучни области на фокус за да останете пред конкуренцијата?
Денис Ампов: Она што го издвојувa Ananas од останатите големи играчи на пазарот е исклучителниот фокус на локализација и персонализација на понудата. Додека многу глобални платформи се ориентирани на масовен пазар, ние сме посветени на тоа да ги разбереме и задоволиме специфичните потреби на нашите корисници во регионот. Ова го правиме преку соработка со локалните трговци и брендови кои имаат значење за локалните потрошувачи, што ни овозможува да понудиме релевантни производи и услуги кои глобалните играчи не можат лесно да ги реплицираат.
Клучните области на фокус за нас се континуирана инвестиција во технологијата, подобрување на логистиката и постојано унапредување на корисничкото искуство. Воведуваме нови функционалности и услуги кои го олеснуваат процесот на купување и ги намалуваат пречките за корисниците. Исто така, нашата стратегија вклучува агресивна маркетинг кампања и проширување на нашата база на редовни клиенти преку разни програми за лојалност и наградување.
Дополнително, планираме да вложиме во воспоставување на поцврсти партнерства со големи меѓународни брендови, што ќе ни овозможи да понудиме ексклузивни производи и услуги. Преку овие активности, ќе можеме да се издвоиме од конкуренцијата и да задржиме значајна позиција на пазарот.
АЕТМ: Кои трендови во е-трговијата сметате дека ќе ја обликуваат иднината на индустријата во регионот, и како се подготвува Ananas да се прилагоди на овие трендови или дури и да биде лидер во нив?
Денис Ампов: Неколку значајни трендови ја обликуваат иднината на е-трговијата во регионот. Прво, растот на мобилната трговија е евидентен, бидејќи сè повеќе корисници купуваат преку своите паметни телефони. Ова ги принудува платформите да бидат целосно оптимизирани за мобилни уреди – нешто на што Ananas активно работи. Нашата апликација и мобилната верзија на веб-страницата се дизајнирани да бидат брзи, интуитивни и лесни за користење. Понатаму, се очекува зголемена побарувачка за побрзи и пофлексибилни методи за достава, како и зголемена употреба на вештачка интелигенција и машинско учење за персонализација на купувањето. Нашата платформа веќе инвестира во овие технологии и планираме да бидеме еден од лидерите во нивната имплементација, што ќе ни овозможи да го задржиме чекорот со најновите трендови и да останеме конкурентни.
АЕТМ: Темата на годинешната конференција е “E-commerce: Untangling Potential” – Како гледате на потенцијалот кој го нуди е-трговијата во државава и регионов? Во што сме добри, а во што треба да се подобруваме сѐ уште за да се постигне целосниот потенцијал?
Денис Ампов: Е-трговијата во Македонија и во регионот е во фаза на експанзија и има огромен потенцијал за раст, особено со оглед на зголемената дигитализација на популацијата и зголемената доверба во онлајн купувањето. Ние сме веќе сведоци на растот на интернет пенетрацијата и младата популација која е навикната на дигитални услуги. Сепак, за да се постигне целосниот потенцијал, има неколку клучни области во кои треба да се подобриме.
Прво, потребно е да се работи на подобрување на инфраструктурата за логистика и испорака, бидејќи ова е еден од најголемите предизвици за е-трговијата во регионот. Иако големите урбани центри имаат пристап до релативно брзи и ефикасни методи за достава, руралните подрачја сè уште се соочуваат со потешкотии во испораката.
Второ, треба да се зголеми довербата во онлајн плаќањето и да се поттикнат корисниците да користат повеќе дигитални методи за плаќање. Потребни се поголеми напори за едукација на потрошувачите и зголемување на нивната свест за безбедноста на онлајн трансакциите.
Дополнително, малите бизниси сè уште имаат ограничен пристап до дигитални алатки и платформи кои би им овозможиле полесно да ги продаваат своите производи онлајн. Поддршката на овие бизниси е клучна за целосната дигитализација на економијата и за постигнување на целосниот потенцијал на е-трговијата.
АЕТМ: Како партнер на 7-та конференција за е-трговија во Македонија, што го мотивираше Ananas да го поддржи овој настан? Колку е важна соработката во индустријата и споделувањето на знаењето за растот на е-трговијата во регионот?
Денис Ампов: Нашата мотивација да го поддржиме овој настан лежи во нашата визија за раст и развој на е-трговијата во регионот. Веруваме дека успешен развој на индустријата може да се постигне само преку соработка и споделување на најдобрите практики. Конференциите како оваа овозможуваат платформа каде сите клучни играчи на пазарот – трговци, технолошки компании, логистички партнери и државни институции, можат да разменат знаење и искуство и да најдат заеднички решенија за предизвиците со кои се соочуваме.
Поддршката на вакви настани е значајна затоа што овозможува градење на силна заедница која заедно ќе работи на забрзан раст на е-трговијата. Споделувањето на знаењето е клучен елемент во подобрување на перформансите на целата индустрија, а со тоа и на Ananas како дел од неа.
