По неколку месеци тестирање на реклами во САД, OpenAI го проширува ChatGPT Ads на 31 европски пазар. Со тоа, ChatGPT постепено се позиционира не само како алатка за пребарување, истражување и донесување одлуки, туку и како нов канал преку кој компаниите можат да допрат до потенцијални купувачи токму во моментите кога тие размислуваат што да купат, кој производ да го изберат или која услуга најмногу им одговара.
Следната недела ChatGPT Ads ќе биде достапен во земји како Германија, Франција, Шпанија, Италија, Шведска, Норвешка, Данска, Холандија и Австрија. Во почетната фаза, огласувачите ќе можат да пристапат преку OpenAI Ads Solutions, агенциски и технолошки партнери, додека ‘самоуслужниот’ пристап преку Ads Manager ќе следи во претстојниот период.
Од пребарување кон донесување одлуки
Досега патот до потенцијалниот купувач за многу компании беше релативно предвидлив: Google Ads, Meta, LinkedIn, TikTok и други дигитални канали.
ChatGPT внесува поинаков тип на интеракција.
Корисникот не мора да внесе само „најдобар лаптоп“ или „најдобар софтвер за мал бизнис“. Наместо тоа, може да објасни што сака да постигне, колкав му е буџетот, кои карактеристики му се важни и со какви ограничувања се соочува.
Токму затоа, ChatGPT станува место каде што корисниците не само што бараат информации, туку споредуваат опции и постепено носат одлука.
За огласувачите, ова отвора нова можност: да се појават во моментот кога потенцијалниот купувач активно истражува и ги разгледува своите опции.
Како изгледаат рекламите во ChatGPT?
ChatGPT Ads не функционираат идентично како класичните реклами во Google или Meta.
Спонзорираната содржина се појавува како посебен дел со наслов, текст, visual и линк. Таа е одделена од одговорот што ChatGPT го дава на корисничкото прашање.
OpenAI нагласува дека рекламите нема да влијаат врз одговорите на ChatGPT. Одговорот на прашањето останува независен од тоа дали и која компанија се рекламира.
Рекламите ќе бидат достапни за корисниците на Free и Go плановите, додека Plus, Pro и Enterprise корисниците ќе продолжат да го користат ChatGPT без реклами.
Тоа значи дека вредноста на овој канал можеби нема да биде во масовниот досег, туку во можноста брендовите да се појават пред корисници кои во тој момент активно истражуваат, споредуваат и се блиску до донесување одлука.
Поинаков начин на таргетирање
Една од најголемите разлики во однос на традиционалните дигитални рекламни платформи е начинот на таргетирање.
ChatGPT Ads овозможува таргетирање според земја и контекст, односно пошироката тема или потреба поврзана со интеракцијата на корисникот. За разлика од платформи како Google и Meta, моментално не се достапни истите нивоа на таргетирање според клучни зборови или демографски категории.
Огласувачите можат да користат и сопствени first-party податоци, на пример листи на клиенти за таргетирање, или исклучување од таргетирањето.
Сепак, разговорите на корисниците не им се достапни на огласувачите. Ова значи дека компаниите не можат едноставно да го видат разговорот и да креираат таргетирање врз основа на конкретната содржина.
Затоа, според досегашните искуства, каналот може да биде особено интересен за компании со јасна и конкретна понуда, наместо за пораки кои се премногу општи.
Каде употребата на ChatGPT Ads може да има најголем потенцијал?
Во оваа фаза, ChatGPT Ads најлогично се вклопува во категории каде што корисникот поминува време во истражување и споредување пред да донесе одлука.
Тоа може да бидат:
- софтвер и дигитални алатки;
- едукација и курсеви;
- патувања и туристички услуги;
- финансиски и професионални услуги;
- производи со подолг процес на одлучување;
- други услуги или производи каде што корисникот активно споредува повеќе опции.
На пример, корисник кој прашува „кој CRM е најдобар за мал бизнис?“ веќе има поинаква намера од корисник кој само гледа случајна содржина на социјалните мрежи.
Токму тука лежи потенцијалот на ChatGPT Ads – рекламата се појавува во контекст на конкретна потреба и процес на одлучување.
Од CPM и CPC кон оптимизација за конверзии
OpenAI во изминатите шест месеци постепено ја развива рекламната платформа. Покрај CPM и CPC наддавањето, воведена е и оптимизација кон конверзии, со што огласувачите можат кампањите да ги насочат кон конкретни бизнис цели.
Воведени се и гео-таргетирање и custom audiences, а мерењето на резултатите е проширено преку OpenAI Pixel, Conversions API и интеграции со алатки за мерење од трети страни.
Според OpenAI, десетици илјади маркетери веќе се огласувале на ChatGPT.
Тоа покажува дека платформата веќе се движи надвор од фазата на мал експеримент, иако сè уште е во рана фаза на развој.
Што значи ова за е-трговијата?
За е-трговците, најинтересниот аспект можеби не е само уште еден рекламeн канал, туку промена во начинот на кој корисниците откриваат производи.
Кога корисникот прашува што да купи, што е најдобро за неговите потреби или како да избере помеѓу неколку опции, тој веќе се наоѓа во дел од customer journey кој традиционално беше покриен преку пребарувачите, маркетплејсите и специјализираните веб-страници.
Со ChatGPT Ads, компаниите добиваат можност да бидат присутни и во тој разговор.
Тоа не значи дека Google, Meta или другите канали ќе исчезнат. Напротив, ChatGPT Ads засега треба да се гледа како дополнителен канал кој треба да се тестира и мери, особено за бизниси чии производи или услуги бараат истражување пред купување.
Нов канал, но сè уште во рана фаза
ChatGPT Ads се развиваат брзо, но платформата сè уште има ограничувања. Форматите на рекламите, можностите за таргетирање и правилата за различни категории се менувале во текот на годината, а се очекуваат и дополнителни промени.
Затоа, за маркетерите и претприемачите најлогичниот пристап не е веднаш да го пренасочат буџетот од постоечките канали, туку да започнат со помал тест, да ги следат резултатите и да проценат каде ChatGPT Ads носи дополнителна вредност.
Со проширувањето на ChatGPT Ads на 31 европски пазар, едно е сигурно: разговорната AI веќе не е само алатка за пребарување информации. Таа станува и ново место каде што се случува откривањето на производи, споредувањето на понуди и – потенцијално – донесувањето на одлуки за купување.
За компаниите, тоа отвора ново прашање: кога корисникот ќе престане да пребарува „што да купам?“ на Google и ќе почне да го прашува ChatGPT, дали вашиот бренд ќе биде дел од тој разговор?
Извори
