Вештачката интелигенција веќе не е само алатка за автоматизација – таа станува новиот „слој“ преку кој корисниците пребаруваат, споредуваат и носат одлуки за купување. Токму ова беше во фокусот на бизнис настанот „Will AI Find Your Brand?“, кој се одржа во организација на АНК Северна Македонија и Represent Communications Скопје.
Настанот ги собра комуникациските експерти, претставници од бизнис секторот и професионалци од дигиталната индустрија, а една од главните теми беше како големите јазични модели (LLM) како ChatGPT и Gemini влијаат врз дигиталната видливост и репутацијата на брендовите.
Денес, корисниците сè почесто директно бараат препораки од AI алатки – од избор на производи и споредба на цени, до препораки за патувања и услуги. Наместо класично пребарување и отворање повеќе веб-страници, AI системите ги сумираат информациите и нудат конкретни препораки уште пред корисникот да ја посети официјалната страница на брендот.
На панел дискусијата учествуваше и Виктор Стојкоски, генерален секретар на Асоцијацијата за е-трговија на С.Македонија (АЕТСМ) и сопственик на svnadesign.com, кој се осврна на влијанието на AI врз e-commerce индустријата:
„AI не го менува само начинот на пребарување, туку целосно го трансформира патот до купување. Наместо корисникот сам да отвора десетици страници, да споредува информации и да бара на кого да му верува, AI системите сè повеќе ќе носат персонализирани препораки врз основа на релевантност, доверба, корисничко искуство и реални податоци. Тоа значи дека во новата дигитална ера, најуспешни ќе бидат брендовите што ќе изградат силна дигитална репутација, јасно присуство и доверба кај корисниците и AI системите.“
На настанот беше потенцирано дека репутацијата денес станува „машински читлива“, односно AI системите ги интерпретираат информациите за компаниите врз основа на релевантни извори, медиумски објави, ПР содржини и сигнали на доверба.
Говорниците се осврнаа и на концептот на „дигитална доверливост“ – идејата дека брендовите повеќе не треба само да бидат присутни онлајн, туку и доволно јасни, структурирани и доверливи за AI системите да можат правилно да ги препознаат и препорачаат.
Преку практични примери и анализи беа презентирани и конкретни резултати од стратегии за AI видливост, при што беше посочено дека компаниите кои навремено ќе инвестираат во своето присуство во AI екосистемите ќе имаат значајна предност во иднина – особено во моментите кога потрошувачите носат одлуки за купување.
Настанот испрати јасна порака до бизнис заедницата: во ерата на AI, прашањето повеќе не е само дали вашиот бренд е онлајн, туку дали вештачката интелигенција знае за него.
