„Европскиот континент е дом на разновидни пазари за е-трговија кои многу се разликуваат. Дигиталните вештини, вклучително и користењето интернет, заедно со куповната моќ се фактори што влијаат врз употребата и растот на е-трговијата. За време на пандемијата предизвикана од covid-19, користењето интернет се зголеми со нормална стапка на раст, заокружувајќи ја годината со 89% од населението што пристапува на интернет (ова ги опфаќа сите 37 земји). Иако БДП не забележа значителен раст, се предвидува дека 2021 година ќе биде подобра економска година за континентот.” – вели извештајот на Ecommerce Europe & EuroCommerce.
Од овој извештај произлегуваат најновите факти за е-трговијата во Европа, вклучувајќи употребата на интернет, е-купувачи, промет на е-трговија и инфраструктурни индекси за 37 земји. Она што е ново во овогодишниот извештај е обемната анализа за содржината на веб-сајтовите, т.е. нејзините карактеристики, особености, како и растот на сообраќајот на најпосетуваните европски веб-продавници низ ЕУ-27.
Во интервју за годишниот извештај за е-трговијата во Европа, претседатeлката на АЕТМ, Нина Ангеловска вели: „Рестриктивните мерки кои ги воведуваа Владите поради Ковид ги натера луѓето да го променат своето однесување. Пандемијата практично ги “натера” луѓето да ги зајакнат своите дигитални вештини, што е особено важно за земјите како Северна Македонија кои имаат ниски дигитални вештини на населението. Најголемите поволности од е-трговијата веќе не беа дефинирани како „заштеда на време и поголема удобност“, туку заштита на здравјето или едноставно немање друг избор за време на забраните за движење (lockdowns) и рестриктивните мерки. Ова беше значаен фактор за забрзување и поттикнување на луѓето да научат како да ги плаќаат сметките онлајн, да купуваат онлајн и сл..”
*Преземете го интервјуто со претседателката на AETM, Нина Ангеловска на овој линк (PDF верзија).
*Извештајот е бесплатен за членовите на АЕТМ.
