ЗАБАВЕН ФАКТ: Генерацијата Z сочинува околу 30% од светската популација.
Не толку забавен факт: 95% од брендовите имаат помало ниво на доверба кај Gen Z отколку кај постарите генерации.
Да, правилно прочита – 95%. Тоа е речиси сите. Ако сакаш да бидеш дел од среќните 5% кои се всушност сакани и во кои има доверба оваа генерација млади луѓе, сериозно треба да го преиспиташ твојот маркетинг пристап.
Она што ги прави уникатни е тоа што се нарекуваат дигитални домородци (digital natives). Тоа значи дека се родени или израснати во ерата на дигиталната технологија и од мали се запознаени со компјутери и интернет – како што го дефинира Оксфорд.
Gen Z vs. Millennials: Зошто еден пристап не важи за двете генерации
Иако постојат мали разлики во годините, повеќето извори се согласуваат дека Генерација Z се родени помеѓу 1995/1996 и 2011/2012. Милениумците, пак, се родените помеѓу 1980 и 1995 година.
Можеби звучи логично дека овие две соседни генерации имаат многу заедничко, но вистината е дека постојат големи разлики меѓу нив.
Еве кои се тие разлики и што треба да имаш на ум како маркетер кога ги таргетираш овие демографски групи:
Вредностите
И Милениумците и Ген Z се фокусираат на автентичност, транспарентност и општествена одговорност. Тие сакаат да поддржат брендови што се залагаат за нешто повеќе од само продажба на производ.
Но, има разлики – Милениумците сакаат добра приказна за брендот, додека Ген Z сака сурова, нефилтрирана вистина. Тие можат да „намирисаат“ лажна порака од далеку, па ако твојата комуникација не е 100% искрена – нема да пројде.
Ќе знаат – како што рековме, оваа генерација е полна со дигитални натурали кои точно знаат како сами да си го најдат одговорот.
📷 https://www.instagram.com/sephoralife/reel/C6EWiSdu1JM/
Пораките
Милениумците може да прифатат реклами што се усогласени со нивните вредности и аспирации, но Ген Z е на сосема друга фреквенција.
Тие се многу поскептични кон сè што изгледа како класична продажна порака. Затоа, ако таргетираш Ген Z, треба да се потпреш на содржина создадена од корисници, хумористична и реална.
Размисли за мемиња, TikTok видеа и реални разговори – без корпоративен жаргон или празни зборови.
Интересот
Ген Z има просечен временски распон на внимание од околу 8 секунди, додека Милениумците можат да останат фокусирани на реклама околу 12 секунди.
Ова значи дека, ако сакаш да го привлечеш вниманието на Ген Z, твојата реклама мора да биде забавна и веднаш да ја пренесе пораката. Сè се врти околу брзото добивање вредност – ако не ја добијат веднаш, продолжуваат со скролање.
Преференциите
Милениумците пораснале со платформи како Facebook и Instagram, но Ген Z е повеќе на TikTok, Snapchat и новите трендови.
Одличен пример за ова е BeReal – платформата стана хит во 2022, но интересот брзо опадна. Многу огласувачи се обидоа да најдат начин да се вклучат, но не успеаја доволно брзо пред платформата повторно да падне во заборав.
📷 https://www.tiktok.com/@burgiemediafusion/video/7166653422400294186?q=bereal&t=1738432884794
Ова значи дека твојата стратегија треба да биде флексибилна и брзо прилагодлива на новите платформи што ќе се појавуваат.
Парите
И конечно, да зборуваме за пари.
Ген Z порасна во време на економска нестабилност, што ги прави најфинансиски свесна генерација досега. Тие не купуваат само затоа што брендот изгледа кул – тие истражуваат.
Ако сакаш да ги придобиеш, подготви се да ги поддржиш твоите тврдења со вистинска вредност.
Сумирано, ако сакаш да им се обратиш на Gen Z, мораш да се откажеш од гланцаниот маркетинг и да влезеш во игра со нови правила: реалноста е поважна од совршенството, брзината е поважна од деталноста, а довербата е поважна од агресивната продажба. Тие ќе те наградат со внимание – но само ако прво покажеш дека знаеш кој се и што навистина ги движи.
Како да создадеш маркетинг кој Gen Z навистина го сака
Gen Z не е лесна публика – тие се паметни, информирани и имаат многу развиен радар за неискреност. Ако маркетингот звучи премногу совршено, премногу “корпоративно” или ако само им продаваш без да понудиш вистинска вредност, ќе те игнорираат. Но ако им пристапиш вистински – автентично, визуелно, хумано и со вредности – ќе добиеш лојална публика која зборува за тебе без да ја молиш.
1. Автентичноста не е опција – туку задолжителна
Не е доволно само да објавуваш содржина; мора да слушаш што зборува твојата публика. Вклучи се во live Q&A сесии, одговарај на коментари и сфаќај ја повратната информација сериозно. Кога купувачите ќе се почувствуваат слушнати – нивната лојалност драстично се зголемува.
Друга добра стратегија е да споделуваш содржини зад сцената, за публиката да може да ја запознае личноста на брендот.
Еве како тоа го прави Gucci, иако се работи за луксузен бренд:
🔗 Пример: Gucci на TikTok објавува видеа каде модели и дизајнери зборуваат директно и искрено, без филтер, што креира чувство на блискост.
2. Визуелна култура = нивен јазик
Gen Z буквално мисли во видеа, гифови, мемиња и кратки визуелни форми. Нивниот прв јазик не е текст – туку визуелна комуникација.
Што значи ова во пракса?
Заборави на статични банери и долги параграфи. Ако некој мора да зумира за да прочита, си изгубил. Користи кратки видеа со „hook“ во првите неколку секунди. Биди во тек со естетските трендови – од боја, до монтажи, до фонтови што ги користат популарните креатори на TikTok.
🔗 Пример: Трендови за 2025
3. Корисничка содржина (UGC) гради доверба подобро од секоја реклама
Gen Z има далеку поголема доверба во врсници отколку во брендови. Наместо сам да кажеш колку си добар, пушти твоите корисници да зборуваат за тебе.
Што значи ова во пракса?
Охрабри ги клиентите да креираат содржина. Организирај предизвици, натпревари, или само дели нивна содржина на твоите канали. Ако некој има критика – не ја бриши, одговори зрело. Сакаат вистина, не совршенство.
🔗 Пример: Starbucks TikTok предизвикот каде луѓето креираат сопствени пијалоци. Брендот само ги поттикнува, а заедницата ја води кампањата.
4. Не продавај производ – продавај вредност
Gen Z расте во време на економска нестабилност, климатски проблеми и општествени неправди. Тие не купуваат „само затоа што изгледа убаво“. Тие купуваат затоа што се согласуваат со вредностите на брендот.
Што значи ова во пракса?
Јасно кажи за што се залагаш – од етика во производството, до социјална одговорност. Покажи ги твоите процеси, од каде доаѓаат материјалите, како се третираат луѓето во синџирот. Ако поддржуваш одредени иницијативи – нека тоа биде затоа што навистина ти е грижа, не затоа што е “тренд”.
5. Хуморот и мемињата рушат бариери
Gen Z има неверојатно чувство за хумор – често ироничен, саркастичен и самоироничен. Ако сакаш да допреш до нив, мора да го разбереш тој слој на комуникација.
Што значи ова во пракса?
Следи meme-културата, но не ја копирај механички. Вклучи млади луѓе кои природно се движат во тие кругови и знаат што функционира. Ако објавиш meme што не го разбираш – ќе изгледаш како родител што се обидува да биде „кул“ на TikTok. Но ако погледнеш добар пример – ќе видиш како мемињата можат да пренесат порака на начин што текст или видео не можат.
Не ги таргетирај – разбери ги.
Gen Z не сака брендови кои само се обидуваат да „ги фатат“. Тие сакаат брендови кои ги разбираат. Тоа значи да зборуваш нивен јазик, да се појавиш таму каде што тие се, и да градиш однос базиран на почит, не на продажба.
Биди вистински.
Биди флексибилен.
Биди активен слушател, не само говорник.
И – најважно од сè – биди човек, не логo.
Gen Z не се генерација што лесно се освојува со класичен маркетинг. Тие не се лојални на брендови – туку на вредности, искреност и заедница. Ако твојата комуникација не е автентична, визуелно релевантна, интерактивна и исполнета со смисла, ќе те прескокнат без двоумење. Но ако им пристапиш како на еднакви – со почит, хумор и реалност – не само што ќе те следат, туку и ќе зборуваат за тебе. Не се прашувај „како да ги натерам да купат“, туку „како да станам дел од нивниот свет“. Тука започнува вистинскиот маркетинг.
